Mamlakatimiz sharafini Osiyo Chempionlar ligasi musobasidan munosib himoya qilayotgan va na mazkur chempionatda, na milliy birinchilikda mag‘lubiyat nimaligini bilmay kelayotgan Toshkentning “Lokomotiv” jamoasi yoqimli an’nasini davom ettirdi. “Temiryo‘lchilar” bu safar mamlakatimiz jamoalari uchun juda noqulay raqib sanalmish Osiyoning o‘tgan asrdagi eng yaxshi klubi—Saudiya Arabistonining “Al-Xilol” jamoasini Toshkentdagi “Bunyodkor” stadionida mag‘lub etishning uddasidan chiqa oldi.
Qayd etish kerakki, shu paytgacha arab jamoasini Osiyo chempionlar ligasi musobaqasi doirasida mamlakatimizning biror jamoasi mag‘lub eta olmagandi. Xatto safar o‘yinlarida durangga ham erisha olmagandi. “Loko” dastlabki o‘yinda 0:0 hisobini qayd etib, bu qora an’ananaga chek qo‘ygandi. Bugungi o‘yindagi 2:1 hisobidagi g‘alaba esa muvaffaqiyatsizlik seriyasini parchaladi.
Endi o‘yin haqida. Aytish kerakki, ikki jamoa o‘rtasidagi bahs ancha shiddatli o‘tdi. Biroq o‘yin borasida “Lokomotiv”da ustunlik bor ekanini tan olish kerak. Toboro kuchli va yaxlit jamoaga aylanib borayotgan “Loko” har jabhada ustun ekanini isbotlay oldi. Tajriba va yoshlik uyg‘unligi jamoaning yutuqlariga asos bo‘lmoqda. Ya’ni Server Jeparov, Temur Kapadze, Nesterov, Maxaradze singari tajribali futbolchilar Aliboyev, Shoahmedov singari navqiron kuchga o‘ziga hos tirgak bo‘ldi. O‘yinda aynan tilga olingan futbolchilarning faolligi yaqqol ko‘zga tashlanib turdi. So‘ngi 5-6 daqiqani inobatga olmaganda, “Al-Hilol” qariyb jiddiy vaziyat yarata olmadi. Qarshi xujum taktikasi ham o‘zini oqlamadi.
O‘yindagi birinchi gol 25-daqiqada Islom To‘xtaxo‘jayev tomonidan kiritildi. Ikkinchi bo‘limda, aniqrog‘i 55-daqiqada Sherzod Fayziyev ikkinchi golni kiritdi. Mazkur golli vaziyatlarda Server Jeparov alohida faollik ko‘rsatdi. Umuman olganda, Jeparov “Loko”da yanada “ochilib” bormoqda va jamoaning ajralmas qismiga aylanib ulgurdi.
Aytish kerakki, "Lokomotiv" jamoasi yana gollar urishi mumkin edi, biroq goh Al-Tunayyanning ishonchli o‘yini, goh xujumchilarning ishonchsiz zarbalari bunga yo‘l qo‘ymadi. Abduxoliqov, Aliboyev, Shoahmedov, keyinroq maydonga tushgan Bikmayevda ham vaziyatlar bo‘ldi. Ammo ularning urinishlari besamar ketdi.
O‘yinning 89-daqiqasida Bejamin Uilyams Islom To‘xtaxo‘jayev jarima maydoni ichida Ailtonga nisbatan qoida buzdi, deb hisobladi va “Loko” darvozasiga penalti belgiladi. 11 metrlik jarima to‘pini Al-Shalhub Nesterov darvozasiga aniq joylab, hisobni qisqartira oldi. Qo‘shib berilgan 4 daqiqa ichida hisob o‘zgarmadi va "Lokomotiv" 4 yillik urinishda so‘ng chorak finalga yo‘l oldi.
"Lokomotiv"ning chorak finaldagi raqibi qur’adan so‘ng aniq bo‘ladi. Qur’a tashlash marosimi esa barcha chorak finalchilar aniqlanganidan so‘ng o‘tkaziladi. Chorak finalning dastlabki uchrashuvi 23-24 avgustda, javob bahslari 13-14 sentyabr kunlari bo‘lib o‘tadi.
Barcha o‘zbek futboli ishqibozlarini g‘alaba bilan tabriklaymiz!
"Lokomotiv" - "Al Hilol" 2:1 Osiyo chempionlar ligasi. 1/8 final. Javob uchrashuvi 24 may. "Bunyodkor" stadioni. 5291 tomoshabin Hakamlar: Benjamin Uilyams, Mettyu Krim, Pol Setrangolo (uchalasi Avstraliya), Sivakorn Pu-Udom (Tailand) Nazoratchi: Kvon Jong Chul (J.Koreya) Komissar: Subramanian Manikam (Malayziya) Daslabki uchrashuv: 0:0
Gollar: Islom To‘xtaxo‘jayev 24, - 1:0. Sherzod Fayziyev 55, - 1:0. Muhammad Al Shlhub 88 penalti, - 2:1.
"Lokomotiv": 1.Ignatiy Nesterov, 5.Kaxi Maxaradze, 8.Server Jeparov, 22.Sanjar Shoahmedov (44.Sergey Proxorov, 84), 11.Temurxo‘ja Abduxoliqov, 28.Ikrom Aliboyev (10.Marat Bikmayev, 70), 17.Salim Mustafoyev, 18.Temur Kapadze (s), 20.Islom To‘xtaxo‘jayev, 33.Oleg Zoteyev (15.Sardor Mirzayev, 76), 37.Sherzod Fayziyev.
Zaxira: 12.Ma’mur Ikromov, 7.Sadriddin Abdullayev, 70.Ivan Nagayev, 77.Jasur Hasanov.
"Al Hilol": 22.Fahad Al Txuayayan, 3.Karlos Eduardo (20.Yosir Al Qahtoni, 81), 4.Abdulla Al Zori, 7.Salman Alfaraj, 9.Ailton, 12.Yosir Al Shahroni, 14.Saud Kariri, 24.Navaf Al Abid (10.Muhammad Al Shlhub, 46), 26.Digao, 29.Salem Aldovsari (19.Xolid Kabi, 74), 70. Mohammed Jahvali.
Zaxira: 30.Muhammad Ahmad Al Vakid, 2.Muhammad Al Burayk, 5.Ahmad Sharahili, 8.Abdulloh Otayf. Ogohlantirishlar: Navaf Al Abid 21, Ikrom Aliboyev 32, Sanjar Shoahmedov 51, Salmon Al Faraj 51, Al Shahroni 90+1.
