Baliq ovi o‘ziga xos qiziq mashg‘ulot. Barcha fasllarga xos universal dam olish vaqti. Suvlarning ovozi eshitilib turgan anhor bo‘yida, tabiat quchog‘ida, turli shovqinlardan narida, qarmoq po‘kagining qimirlashini kutishning ham o‘ziga xos zavqi bor.
Har bir odam hech bo‘lmaganda bir marotaba baliq oviga borgani aniq. Shunday imkoniyat nasib etgan odamlar baliq ovining foydasi haqida yaxshi bilsa kerak. Bu mashg‘ulotdan ham ruhiyat tozalanadi, asablar tinchlanadi, ham o‘ziga xos energiya olinadi.
Baliq ovida eng muhim vositalardan biri –bu spinning (qarmoq). U egiluvchan va ko‘proq yuk ko‘tarish imkoniga ega bo‘lishi kerak. Shunda kattaroq baliq ilinsa, sinib ketmaydi. Bu, o‘z navbatida, qarmoqning ipi ham pishiq bo‘lishi kerakligini anglatadi. Zero, sifatli, pishiq ip omadli baliq ovi hamda yaxshi xordiq asosidir.
Bu borada mutaxassislarning shunday asosiy jihatlarga e’tibor qaratish kerakligini maslahat berishadi.
1-tavsiya: loyqa suv
Loyqa suv doim baliqlarni o‘ziga tortadi. Daryo va ko‘llar, sharshara yonlarida baliqlar ko‘p bo‘lishining sababi ham shundan. Baliqlar tiniq joylarni imkon qadar loyqalatishga harakat qilishadi. Bu ham bir himoya uslubi. Aynan loyqa suv baliq ovlovchi uchun juda yaxshi joy. Bordiyu suv tiniq bo‘lsa, bir oz uzoqroqqa borib, o‘zingiz sun’iy ravishda suvni loyqalatib olsangiz ham bo‘ladi. Ishoning, tiniq suvda ovingiz baroridan kelmaydi.
2-tavsiya: chuqur havza
Barchaga ma’lumki, baliqlar keskin chuqur joylarda sayr qilishni xush ko‘radi. Shuning uchun baliq tutish uchun imkon qadar ana shunday chuqur joylarni tanlash tavsiya qilinadi. Bu ham yoz, ham qishga taalluqli tavsiya.
3-tavsiya: faol xo‘rak
Agar siz xo‘rak sifatida chuvalchang, qurt, g‘umbak yoki boshqalardan foydalansangiz, imkon qadar uning faol bo‘lishiga e’tibor qiling. Ya’ni qarmoq uchida xo‘rak ko‘proq qimirlab turgani foydali. Baliq tirik taomlarni yoqtiradi.
4-tavsiya: baliq uchun yem
Baliq uchun yem—baliq ovining muhim bo‘lagi. Hozir uni tayyorlash uchun ortiqcha vaqt sarflash shart emas. Uni tayyorlashning ming turli usuli internetda juda ko‘p. Ularning yordam tegadi, albatta.
5-tavsiya. ukrop qo‘shish
Ayrim baliq ovlovchilar baliq yemiga hatto qishda ham ukrop ham qo‘shishadi. Bunday xo‘rak baliqlarni o‘ziga tortadi. Ayniqsa, karp oilasiga mansub baliqlarni.
6-tavsiya. baliq tutish joyi
Agar siz daryo qirg‘og‘ida baliq tutmoqchi bo‘lsangiz, unda daraxtlar panalagan joylarni tanlang. Baliqlar bunday joylarni sevadi. Chunki daraxtlardagi ko‘plab qurt-qumursqalar suv jonivorlarini o‘ziga jalb qiladi. Keyin ana shunday joylarda, ildiz ostida o‘ziga xos g‘ovaklar bo‘ladi. Baliqlar bunday joylarda ko‘pincha “mashvarat” qilishadi. Faqat ehtiyot bo‘ling. Qarmoq ipi shox-shabbalarga ilinib qolishi mumin.
7-tavsiya. doimiy baliq yemining bo‘lishi
Baliq chaqiruvchi maxsus yemning doimiy bo‘lishiga e’tibor qiling. Yemak hidini olgan baliqlar siz tomonga suzib kelishini istasangiz, uni tez-tez yangilab turing.
Kerakli buyumlar
Buyumlar, birinchi navbatda, baliq ovlashdan kutilayotgan maqsadga ko‘ra, yig‘iladi. Biroq siz uchun doim zarur bo‘ladigan narsalar ro‘yxati mavjud: chelak, yig‘ma o‘rindiq, tamaddi qilisha yemish, shlyapa, quyoshdan himoyalovchi ko‘zoynak, gugurt va o‘zingiz uchun zaruriy mahsulotlar...
Umid qilamizki, mutaxassislarning bergan tavsiyasiga muvofiq, baliq ovlasangiz, o‘zingiz kutgan natijaga erishasiz. Agar maqsad shunchaki xotirjamlik va osudalik bo‘lsa, unda yana ham yaxshi. Tutgan balig‘ingizni bir ko‘zdan kechirib, suvga qo‘yib yuboring. Bu ham o‘zgacha maroqli. Vaqtingiz bo‘lsa, baliq ovlashga, albatta, borib turing!
