1—7 avgust kunlari davomida 405 736 nafar abituriyent test sinovlarini topshirdi. Bu haqda O‘zbekiston bosh vaziri o‘rinbosari Aziz Abduhakimov Facebook'dagi sahifasida ma’lum qildi.

Imtihonlarning birinchi haftasiga doir asosiy ko‘rsatkichlar aks etgan jadvalga ko‘ra, 11 927 nafar abituriyent turli sabablarga ko‘ra imtihonlarga kelmagan, 887 nafar abituriyent esa qoidabuzarliklarga yo‘l qo‘ygani uchun imtihonlardan chetlatilgan.

Ma’lumot uchun, bu yil oliy o‘quv yurtlariga kirish uchun 675 049 nafar abituriyent hujjat topshirgan edi.

O‘zbekistonda 1 avgustdan oliy ta’lim muassasalariga kirish test sinovlari bo‘lib o‘tmoqda. Test sinovlari 15 avgustga qadar davom etadi.