Tojikiston va O‘zbekiston o‘rtasida avtobus qatnovi 15 maydan yo‘lga qo‘yilishi rejalashtirilgan, deb xabar berdi Tojikiston telegraf agentligi.

"Azia ekspress" korxonasi direktori Sulton Kamolovning aytishicha, Tojikiston tomoni avtobus qatnovini yo‘lga qo‘yishga tayyor, faqat O‘zbekistonning yo‘l kira narxi borasidagi yakuniy qarorini kutmoqda.

Uning so‘zlariga ko‘ra, birinchi bosqichda Xo‘jand-Toshkent va Panjikent-Samarqand yo‘nalishlarida avtobuslar qatnay boshlaydi.

Avvalroq tomonlar Dushanbe-Termiz, Boxtar-Denov, Panjikent- Samarqand va Panjikent-Buxoro, Xo‘jand-Toshkent hamda Konibodomdan Farg‘ona viloyatlariga yo‘nalishlar ochilishiga kelishib olgandi.

Tojikiston tomonining ma’lumotiga ko‘ra, O‘zbekistonga har kuni 10 mingdan ortiq tojikistonliklar boradi.