Бетоб бўлмасликнинг иложи борми ёки дардга чалинсангиз, қандай қилиб тезда соғайиш мумкин? Дори-дармонсиз даволаниш усуллари борми? Қандай тўғри чиниқиш ва шамоллашдан сўнг тезда тикланиш мумкин? Шу ва бошқа саволларга қуйида жавоб топасиз!

1.  Чиниқинг. Асосийси, ўз вақтида, тўғри чиниқишга ҳаракат қилинг.
2.  Иммунитетингизни мустаҳкамловчи табиий препаратларни қабул қилинг. Женьшень, лимон ўти, элеутерококк каби табиий гиёҳлардан фойдаланинг. Бироқ малҳамларни истеъмол қилишдан олдин шифокор билан маслаҳатлашинг.
3.  Грипп мавсумида одам гавжум жойларга борганда махсус ниқоблардан фойдаланинг. Ниқобни ўзингиз ҳам уй шароитида тайёрлашингиз мумкин: дока бўлагига (100х50 см) пахтани ингичка қилиб (30х20 см) қўйинг. Сўнг докани букланг, пахта ичида қолсин ва четини шундай қирқингки, натижада икки жуфт боғич ҳосил бўлсин.
4.  Агар оилангизда кимдир гриппга чалинган бўлса, овқатлангандан сўнг идишларини қайнатинг ёки бемор учун алоҳида идиш ажратинг.
5.  Совуқ ҳавода бурун билан нафас олишга ҳаракат қилинг. Буруннинг шиллиқ пардаси ҳаводаги вирусларни фильтрлай олади. Оғиз бўшлиғида эса ундай эмас.
6.  Октябрдан апрель ойигача ҳар куни С витамини ёки аскорбин кислотаси истеъмол қилинг. Эпидемия даврида витаминларни 1000 мг кўпайтириш керак. Дарвоқе С витаминини шифокор назоратисиз истеъмол қилманг: керагидан ортиқ қабул қилинса, буйракда тош пайдо бўлиши мумкин.
7.  Гриппга қарши эмлаттиринг. Бироқ аввал шифокор билан маслаҳатлашинг.
8.  Уйингизда озодаликка риоя қилинг.
9.  Иложи борича қўлингизни тез-тез совун билан ювиб туринг. Кўчадан келганингиздан сўнг тезда ювиниб олинг.
10. Икки кунда бир марта хонани шамоллатинг ва дезинфекция қилинг. Бунинг учун саримсоқ пиёзнинг бир бўлагини ва аччиқ қалампирни паррак-паррак қилиб тўғранг ва ликопчага солиб, хона четларига қўйиб чиқинг. Бир неча соат турсин.

Манба: Darakchi.uz