2018 йилда Россияда бўлиб отадиган футбол бўйича Жаҳон чемпионати учун дунёнинг барча минтақаларида саралаш баҳслари ўтказилмоқда. 6 сентябрь Ўзбекистон миллий терма жамоаси учинчи саралаш босқичининг иккинчи турида Қатар термасига қарши майдонга тушди, деб Qalampir.uz ёзмоқда.

Футболчиларимиз меҳмонда ўйнаганига қарамасдан минимал ҳисобда (0:1) ғалаба қозонишди. Учрашувда киритилган ягона гол муаллифи Егор Кримец бўлди. Ўзбекистон футболчилари киритилган голни Ўзбекистон Республикаси Биринчи Президенти Ислом Каримовнинг хотирасига бағишлади.

Шу ўринда айтиб ўтиш жоизки, Ўзбекистон терма жамоаси жаҳон чемпионатида иштирок этиш учун учинчи саралаш босқичи бирор марта кетма-кет ғалаба билан бошламаган ва бундай омадли тақвимга эга бўлмаган эди. Вакилларимиз 1 сентябрь куни биринчи тур доирасида Сурия термасига қарши майдонга тушишди ва 1:0 ҳисобида рақибларда устун келишди. Бу ғалаба Ўзбекистон мустақиллигининг 25 йиллигига бағишланган эди. Ўзбекистон кейинги тур учрашувларини 6 ва 11 октябрь кунлари Эрон ва Хитой терма жамоаларига қарши Тошкентда ўтказади. Бу ҳам йигитларимизга мезбонда ғалаба қозониш учун катта устунлик беради.