Месси ҳаётидан 10 та қизиқарли маълумот

Бугун жаҳон футболининг мегаюлдузи, барча даврларнинг энг яхши футболчиси, деб эътироф этилаётган аргентиналик футбол афсунгари, улкан истеъдод эгаси Леонель Мессининг таваллуд топган куни. Месси, айтиш жоиз бўлса, барча футболчилар орзу қиладиган чўққига эриша олган футболчидир. Унинг рекордлари, натижалари бир тараф бўлса, майдондаги ҳатти-ҳаракатлари бир тараф. Чиндан ҳам у Яратган катта иқтидор берган спортчидир.

Лионе́ль Андре́с Ме́сси (исп. Lionel Andrés Messi) 1987 йилнинг 24 июнь санасида Аргентинанинг Росарио шаҳрида дунёга келган. Отаси — Хорхе Орасио Месси комбинат ишчиси, онаси—Селия Мария Месси фаррош бўлган. Унинг Родриго ва Маттиас исмли акалари ҳамда Мария Соль исмли синглиси бор.

Испаниянинг “Барселона” футбол академияси тарбияланувчиси ўз жамоасида 17 ёшида дебют қилган. Шундан буён ўз клуби билан 4 бор Европа чемпионлар лигасида ғолиб чиққан, 6 бор Испания чемпиони бўлган, 3 бор Европа Суперкубогини боши узра баланд кўтарган ва 3 марта клублар ўртасидаги жаҳон чемпионатида шоҳсупанинг энг биринчи поғонасига кўтарилган. Шунингдек, 5 маротаба Европа чемпионлар лигасида тўпурар ва 3 бор Испания чемпионатининг энг кўп гол киритган бомбардири бўлган. У яқинда терма жамоадаги голлари сони бўйича афсонавий “батигол”—Габриель Батистутадан ўтиб кетди. Умуман олганда, Месси кўплаб рекордларни йилдан-йилга янгилаб бормоқда. Қуйида эса Месси ҳаётидан энг қизиқ 10 маълумот билан таништирамиз:

1. Салфетка

Ишонсангиз, Месси “Барса” билан илк шартномаси салфеткага ёзилган.  Бу ҳақида Болалар спорт мактаби мураббийи Карлес Рексач “Биз Месси, унинг дадаси ва акаси билан кафеда эдик. Бизда ҳеч қандай қоғоз йўқлиги боис, тезкор келишувни салфеткада имзолагандик”, деб изоҳлаганди. Ана шу салфетка бугунги кунга келиб, дунёдаги энг қиммат шартномага айланди.

2. Бўй

Мессининг бўйчи 169 см. Бироқ болаликда у жуда кичкина эди. 9 ёшида Мессининг бўйчи 124 см бўлган. Шу боис, шифокорлар унга гормонлар етишмаслигини даволаш учун дорилар буюрган. Айтишларича, Месси ўшанда бу препаратларни қабул қилмаганида, унинг бўйи бор йўғи 140 см.га ўсган бўларди.

3. 47 сониялик дебют ўйин

Месси Аргентина терма жамоаси либосида илк бор майдонга чиққандан 47 сония ўтиб, ўйиндан олинган. Бу 2005 йил 17 август куни Венгрия терма жамоасига қарши учрашувда содир бўлганди. Парагвайга қарши иккинчи ўйин олдидан Лео журналистларга ҳазил тариқасида “Бу қайта дебют бўлади. Биринчиси қисқа бўлганди”, дейди.

4. Ёшлик

2005 йилнинг 1 май санасида Месси Испания биринчилигининг олий дивизионида гол киритган энг ёш футболчига айланди. У 17 ёшу 10 ойлик, 7 кунлигида «Альбасете» дарвозасини ишғол қилган. Кейинроқ бу рекордни Мессининг аниқ тўп узатишидан сўнг Боян Кркич янгилаганди.

У 2006 йили Германияда бўлиб ўтган жаҳон чемпионатида Аргентина терма жамоасидаги энг ёш ўйинчи бўлган. 18 ёшу 357 кунлик Месси Сербия ва Черногорияга қарши ўйиннинг 74-дақиқасида майдонга тушиб, жамоасининг сўнгги голини киритади. Ўшанда Аргентина терма жамоаси болқонликларни 6:0 ҳисобида мағлубиятга учратганди.

5. Кркич Мессининг укаси?!

Қизиғи шундаки, 2004-2011 йилларда “Барселона”да тўп сурган Боян Кркич Лео Месси билан узоқ қариндош бўлиб чиқди. Суриштирув натижаларига кўра, иккала футболчи Эль Поалдаги Переслар оиласининг аъзолари экан. Кўк-анорранглилар юлдузларининг катта бобоси Рамон Перес Льобера 1859 йилда ўша ерда туғилган. Переснинг жияни Аргентинага кўчиб кетади ва у ерда Эйсебио Баро Мессига турмушга чиқади. Бояннинг аждодлари эса Каталонияда қолади.

6. Голллар

Бир куни Месси гол ургач, нима учун осмонга қараши ҳақида гапириб берди: «Мен голларимни бувимга бағишлайман. Айнан у отамга мени футбол тўгарагига олиб бориш таклифини беган. Ҳозир улар бугунги ютуқларим чоғида менинг ёнимда эмас. Бироқ у ҳозиргача мени ва оиламни қўллаб-туради...»

7. Марадона

2007 йилнинг апрель ойида “Хетафе”га қарши Испания Кубоги ўйинида Месси Диего Марадонанинг 1986 йилда қўли билан киритган аср голига жуда-жуда ўхшаш гол муаллифи бўлади. Ўшанда айнан ўша жойда югуришни бошлаб, ўшанча масофа (62 метр) босиб ўтиб, ўшанча рақиб(даврозабон билан 6 нафар ўйинчи)ни алдаб, ўша ўнг қўл билан дарвоза бурчагига гол уради. Фарқ жуда кам эди. «Мен Марадонага ўхшашга ҳаракат қилмайман, чунки мен учун унинг тенги йўқ», - дейди Мессининг ўзи.

8. Қариндошлар

Леонинг икки нафар амакиваччаси бўлиб, бири Макси Бьянкучи Бразилиянинг «Витория», иккинчиси Эммануэль Бьянкучи Сербиянинг «Олимпия» клубида тўп суради.  Бундан ташқари унинг Африкада Леонель Месси исмли адаши ҳам бор.

9. 250 миллион

Лионель Мессининг бугунги нархи 2016 йилгача амал қилувчи шартномасида 250 миллион деб белгиланган. Каталониядаги маоши йилига 9,5 миллион еврони ташкил этади.

10. Тьяго

2013 йилда Месси баданига татуировка чиздирди. Чап оёғида ўғли Тьягонинг исми ва қўлининг расми туширилган.

Қизиқ маълумотлар

-2010 йил 11 март: Месси ЮНИСЕФнинг хайрия ишлари бўйича элчиси этиб тайинланди.

-2012 йил 6 феврал: Time журнали ўз тарихида илк бор муқовага Мессининг портретини жойлаштирди. Унгача журналда футболчилар сурати коллаж ҳолида жойлаштирилган.

-2015 йил 1 январь: Испанияда Мессининг ҳаёти ва фаолияти акс этган “Месси” ҳужжатли фильми намойиш этилди. Уни испан режиссёри Алекс де ла Иглесиа тайёрлаган.

Профессионаллар эътирофи: “Месси аниқ PlayStation ўйинидан!”

 Юпп Хайнкес: Мессининг ютуқлари ерликларга хос эмас. Уни битта сўз билан ифодалаш мумкин—феномен. У ўсмирлигидаёқ Зидан, Пеле, Марадона ва Круифф даражасида ўйнаган.

 Жон Терри: Болаларим Мессини жуда яхши кўради. Футболни тугатиб, бир неча йиллардан сўнг ортимга боқиб, шундай кучли футболчига қарши ўйнаганимни эслаб қувонаман. Мен учун у, шубҳасиз, барча даврларнинг энг яхши футболчиси! У спортга яна кўп йиллар фойда келтирадиган буюк шахс!

 Биксант Лизаразю: Мессини оддий кийимда кўриб, мактаб ўқувчисига ўхшатасиз. Спорт формасини кийган чоғда эса майдондаги қолган футболчилар ўқувчига айланади...

 Арсен Венгер: Месси аниқ PlayStation ўйинидан. Менимча, у сенинг ҳар битта хатоингдан фойдаланади. Бу ўйинчи имконсиз нарсаларни амалга ошира олади. Унда қандайдир ноёб хусусият бор. Уни шунчаки тўхтатиб бўлмайди...

Сўнгсўз: Леонель Месси жуда кўплаб совринларга эришган. Бироқ кубоклар коллекциясида биттаси - энг муҳими йўқ: бу жаҳон чемпионларига аталадиган кубок. Балки 2018 йили Россияда қўлга киритар?!

Интернет манбалари асосида тайёрланди