WSB chorak finalidan joy olgan Uzbek Tigers va Cuba Domadores to‘qnashuvi mezbonlar g‘alabasi bilan yakuniga yetdi va o‘zbekistonlik bokschilar javob janglari oldidan yaxshi imkoniyat hosil qildi.

Boks kechasi Hasanboy Do‘stmatovning ustunligi bilan boshlandi va Osiyo chempionatining nokautchi bokschisi Murod Ahmadaliyevning g‘alabasi bilan davom etdi. Uzbek Tigers uchinchi raunddan keyinoq g‘alabani o‘ziniki qilib olishi mumkin edi. Biroq Iqbol Xoldorov o‘zi kabi Olimpiadaga bormagan kubalik bokschidan mag‘lub bo‘ldi, deb yozmoqda Sof.uz.

Shu tariqa hal qiluvchi jang Isroil Madrimovning chekiga tushdi. Ahamiyatli tomoni, uning raqibi Rio—2016 Olimpiadasida Bektemir Meliqo‘ziyevni mag‘lub etib, yakunda oltin medalga ega chiqqan sportchi edi. Shunga qaramay, Madrimov tajribali bokschidan ustun bo‘lishga erisha oldi — 3:1.

Kubalik bokschilarga qarshi so‘nggi jangda Sanjar Tursunov ringga chiqdi. Mazkur bokschi Osiyo chempionatida ishtirok etgan o‘n o‘zbekistonlik orasida oltin medal ola bilmagan, balki chorak finaldayoq mag‘lub bo‘lgan yagona sportchi edi. Shunga qaramay, Germaniyada o‘tadigan Jahon chempionatiga yo‘llanma olgan Tursunov kubalik raqibiga imkoniyatni boy berdi. Yakuniy natija — 3:2.

Uzbek Tigers — Cuba Domadores 3:2

-49 kg: Hasanboy Do‘stmatov — Xoanis Arhilagos Peres — g‘alaba -56 kg: Murod Ahmadaliyev — Xaver Ibanes Dias — g‘alaba -64 kg: Iqbol Xoldorov — Endi Kruz Gomes — mag‘lubiyat -75 kg: Isroil Madrimov — Arlen Lopes Kordona — g‘alaba -91 kg: Sanjar Tursunov — Erislandi Savon — mag‘lubiyat

Eslatib o‘tamiz, Erislandi Savon mashhur kubalik bokschi Feliks Savonning jiyani hisoblanadi. O‘z vaqtida Ruslan Chagayev Feliks Savonni mag‘lub etgan.