Jeki Chan kino sanoatidagi 56 yillik faoliyatidan so‘ng Akademiya tomonidan sharafli mukofotni qo‘lga kiritdi. 12 noyabrda jahonga mashhur aktyor va rejissyor Jeki Chan kino san’atiga qo‘shgan hissasi uchun faxriy "Oskar" bilan mukofotlangani haqida xabar bergan edik, deb Kun.uz yozmoqda.

Endi esa afsonviy aktyor 2 karra Guinness World Records sovrindori bo‘ldi. Guinness World Records'ning Facebook'dagi sahifasida aktyorni bunday rekord natijalar bilan qutlashdi.

U 1972 yildan buyon katta ekranlarda 100 martadan ortiq kaskadyor-aktyor sifatida namoyon bo‘lgan, shuningdek o‘z karerasi davomida ko‘plab jarohatlar (burun sinishidan to bosh suyagining sinishigacha) olgan Jeki Chan  "Eng ko‘p  tryuklarni o‘zi bajaruvchi aktyor" nomiga ega bo‘lgan.

Shuningdek Jeki "Bir kartinada eng ko‘p vazifani bajargan inson" sifatida ham rekord natijani qayd etgan - "Xitoycha burj" filmida u ssenariynavis, rejissyor, aktyor, prodyuser, ijrochi direktor, operator, art-direktor, ishlab chiqarish guruhi rahbari, ovqatlanish muvofiqlashtiruvchisi, kaskadyor, tryuklar sahnalashtiruvchisi, mer, bastakor, rekvizit va vokalchi vazifalarini o‘zi uddalagan. Jeki Changa topshirilgan mukofot uning mehnatsevarligi va iste’dodini yana bir bor tasdiqlaydi.